البنت بصتلي ودموعها بتنزل على خدودها، وبعدها بصت لأمي وقالت بصوت مخنوق: “كنت فاكرة إنك هتفضلي مخبية الحقيقة لحد آخر يوم في عمرك يا طنط، بس الظاهر إن ربنا أراد إن كل حاجة تظهر النهارده”.
أمي كانت بتترعش، وأبويا قرب منها بسرعة وقال: “اسكتي يا بنتي، والنبي اسكتي! إحنا ممكن نحل كل حاجة، بس مش بالطريقة دي!”.
بصيت لأبويا وأنا مش فاهم حاجة وصرخت: “تحلوا إيه؟! وإنتوا تعرفوا البنت دي منين؟! وليه أمي أول ما شافتها كانت هتموت من الخوف؟!”.
أمي رفعت عينيها ليا، وبعدها بصت للبنت وقالت: “دي مش متسولة يا أحمد… دي… دي!”.
إني سكتت والبنت ابتسمت ابتسامة موجوعة وقالت: “أقولك أنا يا أحمد… أنا اسمي الحقيقي مريم، وبنت الراجل اللي أمك وأبوك دفنوه عايش عشان يلهفو حقه”.
أنا اتجمدت مكاني لما قالت كده ومريم كملت وقالت: “أبويا اسمه محمود الشناوي. كان شريك أبوك في أكبر مشروع دخلوا فيه سوا، لكن أبوك قرر ياخد كل حاجة لنفسه، وأمي ساعدته!”.
بصيت لأمي بذهول، لقيتها انهارت على الكنبة وهي بتقول: “كنت صغيرة يا أحمد، وغلطت، بس والله ما كنت أعرف إن الموضوع هيوصل لكده!”.
أبويا زعق فيها: “اخرسي يا سلوى! إنتي مالكيش دعوة بالكلام ده!”.
مريم ضحكت بمرارة وقالت: “لسه بتأمرها تسكت؟! حتى بعد كل السنين دي لسه فاكر إنك تقدر تخبي الحقيقة زي ما خبيتها زمان!”.
وبعدين بصتلي وقالت: “أنا هحكيلك كل حاجة من الأول، بس قبل ما أحكي، لازم تعرف إن جوازك مني مش هيغير اللي حصل، ومش هيمسح السنين اللي ضاعت من عمري”.
قعدت على أقرب كرسي وأنا حاسس إني داخل كابوس، ومش قادر أصدق إن البنت اللي اتجوزتها من تحت الكوبري ممكن تكون وراها الحكاية الكبيرة دي كلها.
مريم بدأت تحكي.
قالت إن أبوها محمود كان شريك أبويا في شركة مقاولات، وكانوا أصحاب من سنين طويلة. أبوها كان المسؤول عن الحسابات، وأبويا كان بيتولى إدارة المشاريع والتعامل مع العملاء.
في يوم، الشركة دخلت في صفقة كبيرة، وأبويا احتاج مبلغ ضخم عشان يكمل المشروع. أبو مريم وافق يساعده، وحط جزء كبير من فلوسه في الشركة، وكان متفق معاه إن الأرباح تتقسم بينهم بالتساوي.
لكن لما المشروع نجح، أبويا طمع في نصيب شريكه، وبدأ يغير في الحسابات ويخفي مستندات مهمة. ولما أبو مريم اكتشف اللي بيحصل، هدد إنه هيروح يبلغ عنه.
ساعتها أبويا اتصرف بطريقة ما كنتش أتخيلها؛ لفقت له قضية اختلاس، واستخدم علاقاته عشان يضيع حقه، وفي النهاية اتسجن أبو مريم وخسر كل ممتلكاته.
أما أم مريم، فكانت وقتها حامل فيها، وبعد ما جوزها دخل السجن، اضطرت تشتغل في بيوت الناس عشان تصرف على بنتها.
لكن المصيبة ما وقفتش عند كده، فبعد سنين خرج أبو مريم من السجن وهو مريض، وحاول يقابل أبويا عشان يرجع حقه، لكن أبويا رفض حتى يستقبله، وبعدها بأيام مات أبو مريم من القهر والمرض، وساب بنته الصغيرة في الدنيا من غير سند.
مريم مسحت دموعها وقالت: “أنا كبرت وأنا فاكرة إن أبويا مجرم، وإنه سرق فلوس الناس، لحد ما قبل ما يموت بشهور، أمي حكتلي الحقيقة كلها وكانت محتفظة بصورة من مستندات قديمة عرفت منها إن أبوك هو اللي ظلمه”.
بصيت لأبويا وأنا حاسس إني مش قادر أتنفس، وقلت له: “الكلام ده حقيقي؟!الموضوع مش بالبساطة اللي هي حكيته بيها!”.
صرخت فيه: “أمال إيه البساطة؟! راجل دخل السجن ظلم، وبنته عاشت عمرها محرومة من أبوها، وإنت عايش في القصور وبتتكلم عن المستوى الاجتماعي؟!”.
أبويا حاول يقرب مني، لكني وقفت وقلت: “خليك مكانك!”.
وأمي كانت بتعيط وبتقول: “يا ابني، إحنا عملنا كده عشان نحافظ على ثروتك ومستقبلك!”.
بصيت لها بصدمة وقلت: “مستقبلي؟! إنتوا ضيعتوا مستقبل بنت غلبانة عشان فلوس؟! طيب.. طيب ليه أول ما شوفتوها اترعبتوا… عرفتوها إزاي وهي منتقبة؟!”.
أمي نزلت عيونها والبنت قالت: “عرفوني لأني لسه من فترة قريبة جيت لأمك عشان ترجعلي حق أبويا… بس هي رمتلي العباية اللي أنا لابساها دي وقالتلي ابقي عدي كل شهر أديها الهدوم اللي مابلبسهاش”.
كنت هتجنن من الكلام ومصكوم جداً في أمي وأبويا، عمري ما تخيلت يكونوا كده.
مريم قامت من مكانها، ولمت حاجتها البسيطة وقالت: “أنا مش جاية أطلب منكم فلوس، ولا جاية أعمل مشكلة. أنا كنت بحاول أوصل للحقيقة، ولما الظروف ضاقت بيا لقيت نفسي تحت الكوبري، ولما أحمد عرض عليا الجواز ما كنتش أعرف إنه ابن الراجل اللي ظلم أبويا، وعرفت الحقيقة لما دخلت البيت وشفت وش أمك”.
اتصدمت من كلامها وقلت: “يعني إنتي ما كنتيش عارفة أنا مين؟!
هزت راسها وقالت: “لأ، أنا كنت عارفة اسم الشركة واسم أبوك ومكان بيتكم لاني جيته قبل كده لكن عمري ما شفتك قبل كده، ولا كنت أعرف إنك ابنه. أنا وافقت على الجواز لأنك عرضت عليا حياة كريمة، وكنت فاكرة إن ربنا بعتلي فرصة أبدأ من جديد، لكن أول ما جبتني هنا وقولتلي إن ده بيتك فهمت إن القدر رجعني لنفس المكان اللي هربت منه طول عمري”.
حسيت بالخجل من نفسي، أنا اللي كنت فاكر إني بعمل حركة أغيظ بيها أهلي، طلعت اتجوزت إنسانة شايلة وجع سنين، وأنا حتى ما سألتهاش عن اسمها!
قربت منها وقلت: “أنا آسف يا مريم. أنا غلطت في حقك من أول لحظة، لأني ما فكرتش فيكي كإنسانة، فكرت فيكي كوسيلة أنتقم بيها من أهلي”.
مريم بصتلي وقالت: “الاعتذار مش هيغير حاجة يا أحمد. أنا مش عايزة أعيش معاك عشان تشفق عليا، ولا عايزة أفضل في بيتك عشان أنت حاسس بالذنب، وأصلا بعد اللي عرفته وإنك ابن الناس اللي اتسببوا في موت أبويا وضياعي مستحيل أفضل هنا”.
وقبل ما أرد، جرس الباب رن.
أبويا اتوتر بشكل غريب، وأمي قامت بسرعة تمسح دموعها.
دخل راجل في أواخر الخمسينات، لابس بدلة بسيطة وماسك ملف كبير في إيده، وأول ما شاف مريم وقف مكانه وقال: “الحمد لله إني لحقتك يا بنتي!”.
مريم جريت عليه وقالت: “كويس إنك وصلت بسرعة يا عم فؤاد”.
الراجل بص لأبويا وقال: “كان لازم أجي يا بنتي، أنا كنت مستني اليوم ده من أكتر من عشرين سنة، وكنت عارف إن الحقيقة هتظهر مهما طال الزمن، بس كنت مستني لما تكملي 21 سنة وتقدري تاخدي حقك لو مش بالذوق يبقى بالقانون”.
أبويا اتراجع لورا وقال بتوتر: “إنت بتعمل إيه هنا يا فؤاد؟!
فؤاد رد عليه: “جاي أرجع الحق لصاحبه. أنا كنت محاسب الشركة، وكنت شاهد على كل اللي حصل، لكنك هددتني وقتها وخوفت على عيالي فاضطريت أسكت، وبعد ما سافرت احتفظت بنسخ من الحسابات والمستندات اللي تثبت براءة محمود”.
